Lèt Biwo Swivi Akò Montanta (BSA) ak kolektif Pati Politik 30 Janvye voye bay Prezidan Edgard Leblanc – Yon pwoblèm kòwipsyon kap tann Repons imedyat.-

BSA (Bureau Suivi Akò Montana) ak Kolektif Pati Politik 30 Janvye, ki te patisipe nan pwosesis politik 1 Mas 2024 la ki mennen nan Akò 3 Avril 2024 la, vle eksprime gwo enkyetid yo fas ak akizasyon kòwipsyon ki leve kont kèk manm Konsèy Prezidansyèl Transisyon (CPT) depi li te pran pouvwa 25 Avril 2024. Nou toujou kwè nan onè peyi nou e nou rete angaje nan prensip etik ak moralite piblik. Se pou sa, nou santi nou oblije reaji.

Dènye evènman ki lye ak yon tantativ kòwipsyon ki enplike « Konsèy Prezidan » yo, jan sa dokimante nan yon lèt Prezidan Konsèy Administrasyon Bank Nasyonal Kredi (BNC) te ekri, ansanm ak yon plent ki depoze nan ULCC, lage yon lonbray sou gwo responsab Leta yo, fè pouvwa Egzekitif la pèdi kredibilite li, epi mete pwosesis tranzisyon an an danje. Pwosesis sa a, jan l te dekri nan Akò 3 Avril 2024 la, te deja sabote pa « Konsèy Prezidan » yo.

Li enposib pou Egzekitif la, ki konstitiye ak yon Konsèy Prezidansyèl Transisyon (CPT) kote ou gen privilèj pou w prezide, rete an silans devan gwo sispisyon kòwipsyon ki tonbe sou kèk manm li yo e ki fè ke opinyon piblik la ap souke onè Egzekitif la. Malgre denonsyasyon piblik, plent ki depoze ofisyèlman, ak sa pèp la atann, li enakseptab pou ni lòt manm CPT yo, ni Chèf Gouvènman an, pa pran mezi lalwa, moral, ak sitiyasyon politik mande nan sikonstans sa yo.

Noumenm, menm jan ak lòt pati patnè ak lòt òganizasyon nan sosyete sivil la, nou kwè fèmman ke transparans, entegrite, moralite, ak rann kont se valè fondamantal ke Akò 3 Avril la preche epi yo dwe gide konpòtman tout moun ki nan sèvis piblik. Devan eskandal sa yo k ap repete, pou nou rekipere konfyans pèp la, nou mande w, Prezidan Leblanc, ansanm ak CPT ak Gouvènman an, pou:

1. Pran mezi konsèvatwa kont twa « Konsèy Prezidan » ki enplike nan eskandal kòwipsyon BNC a. Mezi sa a ap pèmèt lajistis fè travay li san pwoblèm, retabli konfyans pèp ayisyen nan Prezidans la ki reprezante jounen jodi a pa Konsèy Prezidansyèl Transisyon an, epi asire siksè Tranzisyon an.
2. Fè yon ankèt entènen pou anpeche lòt zak kòwipsyon nan Konsèy Prezidansyèl Transisyon an ak Gouvènman an, epi pou konbat enpinite lè yo pini tout moun ki responsab nan zak kòwipsyon nan Administrasyon Piblik la.
3. Inisye yon odit jeneral nan Administrasyon Piblik la ki gen ladan l òganis ak enstitisyon ki gen otorite endepandan, reprezantan diplomatik, ak tout enstitisyon piblik ki jenere revni; e selon Atik 39 Akò 3 Avril la, mete sou pye yon Pakè Finansye Nasyonal espesyalize, ki ap jere gwo krim ekonomik ak finansye, e ki trete tout atak ki fèt sou finans piblik, onètete, ak bon fonksyònman mache finansye yo.
4. Pran dispozisyon nan nivo Konsèy Prezidansyèl Transisyon an pou aplike pwojè konsansyèl transfòmasyon pasifik sosyete nou an, ke Akò 3 Avril 2024 la pote. Sa ta dwe manifeste nan mete sou pye yon fason objektif ak patisipatif, an akò ak mekanis aplikasyon ki te dakò nan Akò a, gwo chanti Tranzisyon an tankou: mete sou pye yon gouvènman inyon nasyonal; ògàn kontwòl Tranzisyon an; Konsèy Nasyonal Sekirite a; enstalasyon yon komite konsansyèl pou Konferans Nasyonal la ak refòm konstitisyonèl la; kreyasyon yon Komisyon Verite, Jistis, Reparasyon; konsiltasyon transparan pou mete sou pye yon Konsèy Elektoral Pwovizwa kredib, òganizasyon eleksyon san pwoblèm, enklizif ak transparan d’ici 7 Fevriye 2026.

Nou vle kòmanse ak kontinye diskisyon fòmèl ak transparan ak lòt Pati Patnè yo ak lòt gwoup òganize nan sektè politik la ak nan Sosyete Sivil la pou agrandi konsansis la sou nesesite pou ranfòse mobilizasyon sitwayen kont kòwipsyon ak enpinite nan aparèy Leta a. Demach nou reflete angajman nou pou prezève konsansis la an favè yon egzekitif bisesèf, pou kenbe balans nan pouvwa a, pou garanti estabilite Tranzisyon konsansyèl la, epi pou anpeche peyi nou plonje nan nouvo peripesi.

Nou swete, lè sa posib pou ou, kòmanse diskisyon fran ak sensè ak Konsèy Prezidansyèl Transisyon an sou fason pou nou reyalize redresman politik ki nesesè, an akò ak Akò 3 Avril 2024 la.

Nan ap tann repons ou, Kolektif Pati Politik 30 Janvye ak BSA ap mande w aksepte, Mesye Prezidan, salitasyon respekte ak patriyotik nou yo.

About The Author

admin

See author's posts